سلام عليكم
حبيت اضيف هالموضوع للفائده العامة بتاريخ شهر 1 من عام 2025
وراح اشرح بعض النقاط لعل تفيد احد اخر بالتقديم :
الموقع التصفح فيه سيء وممكن يحذف كل شيء عليك وترجع تعيد كتابته والخدمة عندهم اسواء من الصغير للكبير ، واستثني من هالكلام البنات السعوديات الي شغالين بالكاونترات , لكن الميزه فيه موعد حجز سريع + مواقف السيارت بالهبل و الموقع مافيه زحمة ورايق كانه فندق مختلف تماما عن تجربتي السابقة مع الفرنسية ، كذلك احب اضيف المركز مايقبل الفيزا او الماستر كارد فقط مدى شغل بقالات يعني يمكن من هذا الشيء تعرف انك مقبل على مقصف 🙂
اول شيء تسويه كالعادة حجز وهمي من بوكنق و الخطوط السعودية او غيرها :
#بوكنق بتروح تحجز فندق با ايميل وهمي و الدفع عند الوصول تأكد بس ان اسمك صحيح والتواريخ صحيحه
# حجز وهمي من الخطوط السعودية تحط اسمك معلومات جوازك كل شيء وتختار السداد عن طريق خدمة سداد واطبع الملف حسب عدد التذاكر لكن لازم لكل شخص نسخة حتى لو عائله
# الان تروح الموقع
https://saudi.blsspainvisa....
# وتعبي الابلكيشن هذا : "" لكل شخص ابلكيشن ""
نصيحة اذا انتم اكثر من شخص سوي لك ملف وورد وحط البيانات المهمه فيه عشان تنسخ وتلصق وتكون متنطابقة
مثل الاسم العنوان توايخ الميلاد وتاريخ نهاية الجواز رقم الجواز اسم الفندق عنوان الفندق رقم التليفون الايميل مدة الاقامة .... ... الخ
https://saudi.blsspainvisa....
قيمة الرسوم والخدمات بتحصلها هنا : ( اعتقد توصل 500 ريال للفيزا مع التوصيل )
https://saudi.blsspainvisa....
# اذا خلصت تحجز موعد من هنا وبتعبي نفس المعلومات من الابلكيشن لكل شخص او عائلة او قروب :
https://saudi.blsspaingloba...
اذا حجزت الموعد اطبع الموعد لكل شخص لاتكتفي بنسخة وحده حتى لو انتم عائلة
طيب ايش الطلبات الان : لكل شخص
- ابلكيشن مطبوع بمعلومات الشخص
- صورة من الجواز
-صورة من اي تأشيره سابقه للشنقن او تأشيرات اخرى
- صورة شخصية عدد 2 مقاس 4 في 6 بدون شماغ او شيء على الراس
-كشف حساب بنكي حق 3 شهور او 4 ( تطبع الصفحة الاولى والاخيره فقط) لازم يكون فيه اقل شيء 8 الاف ريال ، تقدر تلفقها اذا ماعندك لكن حاول تكون متطابقه يعني الصفحة الاولى والاخيره وافهم يافهيم ..
- خطاب من الشركة او المكان الي انت شغال فيه يبين انك موظف وكم راتبك ولازم يكون مختم غرفة تجارية واعتقد الحكومي ماله داعي
- صورة من الهوية مترجمة - فيه ملفات مفتوحة بالنت مب لازم تشتري الخدمة (جوجل).
-صورة من كرت العائلة اذا فيه زوجة او اطفال - مترجمة فيه ملفات مفتوحة بالنت مب لازم تشتري الخدمة (جوجل).
- صورة من التأمين الصحي - كل شخص عنده تأمين بالسعودية يقدر ياخذ تأمين من نفس الشركة يعني اذا انت تعاونية ادخل من التطبيق وتقدر تحصل تأمين صحي مجاني موجهه للسفاره الي تبيها.
- صورة من كرت الوظيفه ID واذا فيه بزنس كارد بنفس الصفحة . ( طلب سخيف لكن من جوجل لفقتها ).
- اذا عندك اطفال وزوجة بتسوي لهم زي الخطاب المالي انك تضمنهم وانك دافع المصاريف لكل شخص صورة وتوقع عليها وتحط معلوماتك رقم جوازك رقم تليفونك اسمك ... الخ
- صورة من حجز السفر لكل شخص
- صورة من حجز الفندق لكل شخص
كل ابلكيشن لازم يحتوي على كل الي ذكرته لاتكتفي بصورة وحده خصوصا اذا انتم عائله لان الجماعه بالمركز يدورون الزله عليك
كل هذا عشان تدفع رسوم خدمات والاسعار للامانه فلكية ، واجهت مشكله غريبة معاهم قالوا لي نعطيك نص ساعة عشان تحلها او تدفع 470 ريال نمدد لكل الوقت 4 ساعات مع العلم قيمة موعد جديد من بكره مايكلف 70 ريال بس اي اسلوب ملتوي عشان يشفطونك والي بيدخل تقييم جوجل بيفهم السيناريو تبعهم
جوازك اذا وصل السفاره الاسبانية ماتاخذ يومين وتعطيك الفيزا والتوصيل ياخذ 3 الى 4 ايام وقيمة التوصيل 92 ريال للجواز الواحد ، لذلك لو تستلمها انت افضل وبتوفر خصوصا لو عندك اكثر من جواز
اخيراً الفيزا الي وصلتني 4 سنوات وزميلي 3 سنوات مع العلم ينتهي الجواز في 2030
ولا اعرف ليش ما عطوني 5 سنوات .
الخلاصة المركز مش بطال للي يبي مكان رايق بعيد عن الزحمة ومشاكل مواقف السيارات واسحب رقم وتعال بدري ... الخ مثل الفرنسية لكن حاول بقدر المستطاع توفر كل المطلوب لاتخلي شيء لانك بتدفع مقابله عندهم والجماعه جاهزين بمكينة الفلوس
بتنحلب حلب ولاتعتقد بتكلم ناس تتفهم او شيء لا هو اساسا تحسه جاي يدور عليك الزله لا تستغرب يقولك ليش لون ثوبك ابيض تعال برمادي عادي جدا ، بس مدام انه اواراقك كامله وسليمه خش بعينه
وهذي تجربتي لعل وعسى تفيد احد